வள்ளுவரைத் தமிழ்கூறும் உலகில் தோன்றிய முதல் பகுத்தறிவாளர் எனக் கூறலாம். ஏனெனில் எந்தவொரு கருத்தையும், சிந்தனையையும் உள்ளவாறு ஏற்காமல் பகுத்து நோக்கி, என்ன ஏது என்று ஆராய்ந்து உள்ளத் தெளிவு பெற்று ஏற்க வேண்டும் என்பதையே வள்ளுவர் கூறுகிறார்.
பகுத்தறிவு என்பது யாதென வள்ளுவர் பின்வருமாறு வரையறை செய்கிறார்
குறள் #355
அதிகாரம் மெய்யுணர்தல்
எப்பொருள் எத்தன்மைத் தாயினும் அப்பொருள்
மெய்ப்பொருள் காண்பது அறிவு
எந்தப் பொருளானாலும், அது எப்படிக் காட்சி தந்தாலும், அப்பொருளின் வெளித்தோற்றத்தை மட்டும் வைத்துக்கொண்டு ஆராயாமல் அதுபற்றிய உண்மையை ஆழமாக ஆராய்ந்து உணர்வதுதான் அறிவுடைமையாகும்.
குறள் #423
அதிகாரம் அறிவுடைமை
எப்பொருள் யார்யார்வாய்க் கேட்பினும் அப்பொருள்
மெய்ப்பொருள் காண்பது அறிவு
எந்த விடயமாகினாலும் அதை யாரிடத்திலிருந்தோ அல்லது எந்த இடத்திலிருந்தோ கேட்டாலும், கேட்டவாறே கொள்ளாமல்; அவ்விடயத்தின் மெய்யானப் பொருளைக் காண்பதே அறிவாகும். சுருங்கக்கூறினால் எந்தக் கருத்தை எவர் சொன்னாலும், அக்கருத்தின் உண்மையைக் காண்பது அறிவு.
மேற்கூறிய இக்குறள்கள் பகுத்தறிவின் தாற்பரியத்தை விளக்குகின்றன. மேலும் பகுத்தறிவின் சிறப்பை வள்ளுவர் பின்வருமாறு கூறுகிறார்.
குறள் #354
அதிகாரம் மெய்யுணர்தல்
ஐயுணர்வு எய்தியக் கண்ணும் பயமின்றே
மெய்யுணர்வு இல்லா தவர்க்கு
உண்மையைக் கண்டறிந்து அல்லது ஆராய்ந்து தெளிவடையாதவர்கள், தமது ஐம்புலன்களையும் அடக்கி எத்தகைய துறவற வாழ்க்கையிலும் வெற்றி கண்டிருந்தாலும் கூட அதனால் அவர்களுக்கு எந்தப் பயனும் இல்லை.
அடுத்த பிறப்பு முற்பிறப்பு என்ற அறியாமையில் இருந்து நீங்கு, என மூடக்கொள்கைகளை எதிர்க்கிறார் வள்ளுவர்.
குறள் #358
அதிகாரம் மெய்யுணர்தல்
பிறப்பென்னும் பேதைமை நீங்கச் சிறப்பென்னும்
செம்பொருள் காண்பது அறிவு
அடுத்த பிறப்பு எனக் கூறப்படும் அறியாமையைப் போக்கித் தெளிந்த உண்மையை நிலைநாட்டுவதுதான் அறிவுடைமை அல்லது பகுத்தறிவாகும் என்கிறார் வள்ளுவர்.
வள்ளுவன் எமக்கு என்றோ பகுத்தறிவுச் சிந்தனைகளை புகுத்திவிட்டான்
எனவே வள்ளுவனின் குறள்களிலும் மெய்ப்பொருள் காணவல்லது பகுத்தறிவு ஆகும்.
Alivetamil blog
http://www.alivetamil.blogspot.com
Categories:
தமிழ்மொழி
0 comments:
Post a Comment